होली पर्व (फागु पूर्णिमा)को अवसरमा प्रदेश नं.१ का उद्योग, पर्यटन,वन तथा वातावरण मन्त्री मा. जगदीशप्रसाद कुसियैतले दिनुभएको शुभकामना सन्देश।
आदरणीय प्रदेशबासी दाजुभाइ तथा दिदीबहिनीहरु
यही चैत्र १५ र १६ गते रंगको पर्व भनेर होली अर्थात् फागु पूर्णिमा नेपालभरि मनाइदैछ । एक आपसमा रङ्ग आदान प्रदान गरेर मनाइने यो पर्वको धार्मिक, पौराणिक, साँस्कृतिक तथा सामाजिक महत्व उल्लेखनीय छ । साथै यो पर्वले हामी विभिन्न जातजाति, धर्म,पुस्ता र भूगोलका मानिसहरुलाई एकतावद्ध पनि गराएको छ । पहाड र तराईमा अलग अलग दिन मनाइएता पनि यसले सबैको भावनालाई एक सूत्रमा उनेको छ । हरेक वर्ष होली पर्वमा नयाँ उमङ्ग तथा आयामहरु थपिँदै आएका छन् र यसमा हुने सहभागिता समेत बढ्दै आएको छ ।
होलीमा प्रयोग गरिने रङ्गहरु कतिपय गुणस्तरहीन र स्वास्थ्यका लागि हानिकारक हुन्छन् । यस्ता रङ्गमा हुने गह्रौँ धातुका पदार्थहरुले स्वास्थ्यमा धेरै नोक्सानी गर्ने भएकोले जस्तोसुकै रङ्ग प्रयोग नगर्न आग्रह गर्दछु ।
विश्वभर फैलिएको संक्रामक रोग कोभिड–१९ का कारण गत वर्ष उल्लासमय हुन नसकेको होली पर्व यसपालि पनि कोभिडकै कारण प्रभावित बन्न पुगेको छ । धेरै भिडभाड गर्न नहुने अवस्था भएको कारण खुला रुपमा होली पर्व नमनाउन आग्रह गर्दछु । तसर्थ परिवारभित्र मात्रै, घरभित्र मात्रै दूरी कायम गरी होली पर्व मनाउन अग्रह गर्दैै सम्पूर्ण प्रदेशबासी,देशबासी र विदेशबासी दाजुभाइ दिदीबहिनीहरुमा हार्दिक शुभकामना व्यक्त गर्दछु ।